Яшьләр өчен күңел сөенә

Февральнең соңгы көннәре иде. Җомга намазыннан соң Мирный бистәсендәге «Тынычлык» мәчете имам хатибы Камил хәзрәт Сәмигуллин халыкка:
«Хөрмәтле дин кардәшләрем! Ястү намазыннан соң мәчетебезгә Төркия мәмләкәтеннән күренекле дин галимнәре килә. Алар безгә вәгазь сөйләп, биргән сорауларыбызга җавап тотып китәргә ризалаштылар. Сезне ястү намазына чакырып калабыз, килергә тырышыгыз», - диде.
Һәркөн 5 вакыт намаз укылып бара торган мәчетебезгә 50дән артык кеше килгән иде. Аларның күбесе - яшьләр, кайберәүләре бәләкәй уллары белән. Ястү намазына азанны кунакларның берсе әйтте. Мәхәлләбезгә искиткеч моңлы-серле азан тавышы яңгырады.
Намаздан соң мөнбәргә Махмуд Шевкет Устаосман углы чыкты да йомшак-ягымлы тавышы белән әңгәмә башлады. 55-60 яшьләрдәге бу кеше шулчаклы сөйкемле күренде: җыйнак кына сакал-мыек, мөлаем күз карашы, йомшак ягымлы тавышы. Барчабызны да үзенә җәлеп итте ул. Төрки тел безгә ят түгел, тәрҗемәсез дә сүзнең ни хакта барганын сиземләп була икән. Дөрес, әйткән сүзләрен тәрҗемәче дә аңлатып барды. Ул безгә Коръән аятьләренең мәгънәләрен төшендереп һәр мөселманга 5 вакыт намаз укуның фарыз гамәл икәнлеген җиткерде.
Ахырдан безне чәй мәҗлесенә пылау ашарга дәштеләр. Табын зур ашъяулыклар җәелгән идәндә хәстәрләнгән иде. Яшьләр аякларын чын мөселманнарча бөкләп утырдылар, булдыралар икән бит, исең китмәле. Вәгазь вакытында һәм ашка дога кылганда тагын бер төрек галиме Мухаммад Йелькенджине дә тыңлап сөендек.
Камил хәзрәт кунаклар белән тылмачсыз бик иркен әңгәмә алып барды, аның белемле, дәрәҗәле, абруйлы кеше булуы күренеп тора иде.
Шунысы бик куанычлы, әле кайчан гына Совет Армиясе көне уңаеннан яшьләребез эчеп, сүгенеп, тавыш куптарып йөрсәләр, бүген аларның күбесе аек. Алар рульдә, мәчеткә килеп намаз укып, берсен-берсе бәйрәм белән тәбрикләп, матур итеп ял итәләр бит хәзер.