«Татмедиа»да чесбол турниры: журналистлар шахматчы балаларга каршы көч сынашты

Бу үзенчәлекле уенда журналистлар инде икенче тапкыр катнашты. Беренчесендә “Татмедиа” хезмәткәрләре дүрт командага бүленеп, үзара уйнаса, бу юлы журналистларга көндәш итеп шахмат түгәрәгенә йөрүче балалар чакырылган иде.
 
Чесбол — 8x8 форматында команда белән уйнала торган шахмат төре. Һәр катнашучы үз вертикалендәге фигуралар өчен җаваплы, ә уенда йөрү хокукы төймәгә беренче булып баскан уенчыга  бирелә. Регламент буенча, партия вакытында уенчылар арасында аралашу катгый тыела. Һәр команда бер тапкыр тайм-аут алырга хокуклы. Уен вакытка үткәрелә.
 
Чесбол концепциясенең авторы — Казан инженеры Степан Сильвестров. Ул 2009 елда дисциплинаны булдырган һәм бүген Чесбол федерациясен җитәкли.
 
 Бу юлы командалар асфальтка җәелгән зур шахмат тактасында ярты метрлы фигуралар белән эш итте. Барлыгы ике уен уйналды – икесендә дә олы абый-апаларын җиңеп, балалар командасы җиңү яулады. Афәрин, үсеп килүче буын! Араларыннан шахмат буенча чемпионнар да үсеп чыгар әле, Аллаһы боерса.