Яңа елда сезне төрледән-төрле сәяхәтләр көтә: 27 декабрь - 3 гыйнварга йолдызнамә

Кучкар (21 март – 20 апрель)
2024 ел сезгә җиңелләрдән бирелмәде, ләкин сез барысын да җиңеп чыктыгыз. Бу ел сезне ныгытты, үз сүзегездә торырга өйрәтте. Ә алдагы ел бары шатлыклар гына алып килер, чөнки сез моңа һичшиксез лаек.

Үгезбозау (21 апрель – 20 май)
Ел башындагы сез һәм хәзерге сез бөтенләй ике төрле кеше. Җиңел сулап куйсагыз да була, 2025 ел тормышыгызның барлык өлкәләрендә дә уңыш китерер, кул җәеп каршы алыгыз гына.

Игезәкләр (21 май – 21 июнь)
2025 елда ялгыз игезәкләрне яңа танышулар көтә. Бәлки, үз ярыгызны табып, гаилә корып җибәрерсез. Гомумән, киләсе ел шәхси тормышыгызга яңалык кертер. Сөйгәнегез сезне көтә.

Кысла (22 июнь – 22 июль)
Кыслаларга 2025 ел шәхси үсеш алып килер. Холкыгыз ягыннан ныгырсыз, җәмгыятьтә дәрәҗәгез, абруегыз артыр. Хыяллар бер-бер артлы чынга ашып торыр. “Мин болай да булдыра аламмени?!” диярсез.

Арыслан (23 июль – 23 август) 
Бик күптән хыялыгызны тормышка ашырыр өчен акча җыеп килгән булсагыз, бик тиздән җыеп бетерерсез. Инде болай да тырыш Арысланнарга киләсе ел яңа көчләр һәм акчалар өстәр. Шуңа моңаймагыз, 2025 елда акча белән кыенлыклар булмас. 

Кыз (24 август – 23 сентябрь)
Кызлар өчен 2025 ел бизнес ачу өчен бик яхшы вакыт. Йолдызлар сезне алдаудан, акча югалтудан саклар. Күптәнге хоббиегызны бизнеска әйләндереп, үзегезгә дә, башкаларга да файдалы булган эш башлап җибәрегез.

Үлчәү (24 сентябрь – 23 октябрь)
Ел буе өйдә утырган булсагыз, чемоданнарыгызны тутыра башлагыз. Яңа елда сезне төрледән-төрле сәяхәтләр көтә. Башта, бәлки, күрше шәһәргә, өлкәгә барып килерсез. Ә соңыннан хәтта чит илләргә кадәр барып җитәрсез.

Чаян (24 октябрь – 22 ноябрь)
Барысын да тырышып, эшләп алырга ияләнгән чаяннарга 2025 ел җиңеллек, рәхәтлек алып киләчәк. Әйе, әйе, гаҗәпләнмәгез. Башта бу сезгә сәер тоелыр. Ләкин соңыннан ошап китәр. Проблемаларыгыз үзеннән-үзе хәл ителер.

Укчы ( 23 ноябрь – 21 декабрь)
Ел буе тырышканыгыз юкка булмас. Яңа елда карьерагызда зур уңышлар көтелә. Көтелмәгәндә йә вазыйфагызны, йә хезмәт хакыгызны күтәрерлер. Җаваплылык та артыр. Мораль яктан әзерләнә торыгыз.

Кәҗәмөгез (22 декабрь – 20 гыйнвар)
Быел булган барлык уңышсызлыкларны кәбисә елына аударып калдырыгыз да, 2025 елга яңа “мин” белән керегез. Яңа “мин” эштән курыкмый, барлык хыялларын тормышка ашыра һәм бернәрсәдән дә курыкмый. 

Сукояр (21 гыйнвар – 18 февраль)
Бөтен эшләрегезне бетерегез дә, тынычланып киләсе елга аяк басыгыз. Киләсе ел инде сезне болай сынамас. Сез күптән бу сынауны үттегез. Ә хәзер бары җимешләрен һәм бүләкләрен генә аласыгыз калды.

Балык (19 февраль – 20 март)
Яңа елны ничек каршыласаң, ел да шундый булыр диләр. Шуңа гел елмаябыз, көләбез, тормышка рәхмәт әйтәбез. Кая матурлык, шунда балыклар. 2025 елны да матур итеп, елмаю белән каршы алыгыз.

Фото: ru.freepik.com