Яу кырында һәлак булган Ранис турында: “Безгә исән дип тә әйттеләр”

– Ранис гаиләбездә 1995 елның 11 ноябрендә өченче бала булып дөньяга килде. – Яшь арабыз җиде ел безнең, икенче әнисе кебек булдым. Ленино-Кокушкино авылында белем алды. Мәктәптә укыганда ук компьютер белән җенләнә башлады. Тугызынчы сыйныфтан соң Казан политехника көллиятендә токарь-станочник һөнәрен үзләштерде. Эшләп укыды: кичләрен автомойкада машина юа иде. 

Ранис армия хезмәтен Йошкар-Ола шәһәрендә ракета гаскәрләрендә үткән. Аннан кайткач «Пестречинка» кошчылык фабрикасында, тагын шәхси оешмада эшләгән. Әле моннан тыш күпме сынаулар төшкән аның җилкәсенә. Берничә тапкыр юл һәлакәтенә очрап исән калган егет ул. 

– Махсус хәрби операциядә хуҗалык белән тәэмин итү бүлегендә машина йөртүче булып хезмәт итте. Луганскида Меливодка авылы янында тордылар, элемтәсез вакытлар да шактый иде. Ул алгы сызыктан кешеләрне алып чыга торган булган, окоп һәм блиндажлар өчен төзелеш материаллары да ташыган. 2023 елның 18 октябрендә энем янында кассета бомбасы шартлап, башы яраланган. Үлеме әнә шулай булган. Безгә исән дип тә әйттеләр. Шуңа бер атна эзләдек. Ике көннән ялга кайтырга, 28 яшьлеген үткәреп китәргә тиеш иде, – ди Ралия.
Ранис Имамиевка үлгәннән соң «Батырлык ордены» тапшырылган.