Караңгы төстәге итне алмавың хәерле – аның иске булуы бар: шашлык өчен ит сайлыйбыз

Суытылган ит сайлаганда аның тышкы кыяфәтенә һәм исенә игътибар итегез. Әгәр иттән бераз гына булса да әчегән, бозылган һәм химия исе килсә, сатып алудан баш тартырга кирәк. Яңа суытылган ит – коры, ләкин шул ук вакытта бераз ялтыравык, тигез төстә. Иткә бармак белән бассаң, ул дымлы булырга, ябышырга һәм каны саркырга тиеш түгел. Сатып алыр алдыннан, һичшиксез, суытылган итне төрле яклап карагыз, чөнки сатучылар еш кына кисәкләрне, маен һәм сеңерләрен эчкә яшереп салалар. Караңгы төстәге итне алмавың хәерле – аның иске булуы бар. Кайчак суытылган ит сыйфатында, кулланучыга туңдырылып, яңадан эретелгән итне тәкъдим итәләр. Моны шулай ук иткә бармак белән басып тикшерергә була: ит сыгылмалы булырга тиеш. Эретелгән итнең төсе көчлерәк, консистенциясе көпшәк, ит согы кызыл. Туңдырылган итне шашлык әзерләү өчен кулланырга мөмкин, ләкин тәм сыйфатлары буенча ул суытылганыннан калышачак. 

Әгәр сез кибеттән маринадланган шашлык сатып алырга уйласагыз, маркировканы өйрәнү мөһим. Әзерләү вакытына игътибар итегез: маринад, күп дигәндә, бер атна сакланырга мөмкин. Датасы штампланган булса яхшырак. Әгәр дә сез пластик чиләктәге шашлыкны сайлыйсыз икән, капкачына игътибар итегез. Ул бераз эчкә таба сыгылган булырга тиеш, һич кенә дә кабарган түгел. 

Консервантлар составын карагыз – аларны исемлек ахырында күрсәтәләр. Лимон кислотасы булса яхшырак. Ул ашказаны лайласына натрий диацетаты һәм цитраты кебек агрессив тәэсир итми. Шулай ук составта фосфатлар булмавына инаныгыз. Әгәр составында Е450 булса, сатып алудан баш тарту яхшырак – ул дым тотып торучы агент. 

Шашлыкта артык күп сыеклык булырга тиеш түгел. Суытылган ит маринадны йота, ә серкә салынган туңдырылган ит, киресенчә, сок бүлеп чыгара. Серкә-лимон маринадлары иткә 3 көн дәвамында бозылырга ирек бирми, ә майонез-кефир соусындагы ит тизрәк бозыла. «Дөрес» ярымфабрикат-шашлыкның составы: ит, тоз, серкә, суган, тәмләткечләр (борыч, имбир, кориандр һ.б.).