Үләнче Фирая Захарова: “Сезонында өч литр каен җиләге ашап калырга кирәк”

Әңгәмәдәшем әйтүенчә, аңарда С витамины күп, файдалы кислоталар, клетчатка, калий, магний, антиоксидантларга бай. Анемиядән, ашкайнату системасында проблемалары булганнар өчен ашарга киңәш ителә. Иммун системасын ныгыта, бөерләр эшчәнлеген яхшырта. 
– Кечкенә вакытта без аны юкә яфрагына куеп ашый идек. Үзенчә бер десерт булган инде ул. Сезонында бер өч литрлы җиләк ашап калырга кирәк, – ди үләнче.  
Файдалылыгы ягыннан бакча җиләге дә аннан калышмый. “Аңарда бөтен кирәкле макро- һәм микроэлементлар бар. Клетчаткага бай. Бакча җиләге склероздан, йөрәк-кан тамырлары системасы авырулары, калкансыман биз белән проблема булганда, бавырга файдалы. Шикәр авыру булганнар да аны ашый ала, ул шикәр күләмен бик күтәрми. Эч катканда булыша. Аны куллану билгеле бер авырулар килеп чыгу куркынычын киметә, шул исәптән яман шешне дә. Шул ук вакытта аллергия булганнарга сак булырга кирәк, – дип киңәшләрен бирде Фирая ханым.