Җылы түтәлдән бозауга кадәр: тәҗрибәле киңәшләр

Тәския апа, помидорның “Сахарный гигант”, “Гигант красный”, “Бычье сердце гигант” сортларын алдым. Алар яхшымы?

Мондый сортларны утыртырга теләсәгез, тәрбияләүне дә онытмагыз. Күп помидор аласыгыз килсә, ашлагыз, карап торыгыз, ашланган җиргә утыртыгыз. Теплицага чыгарганнан соң ике атна узгач препаратлар белән тукландыра башлагыз.

Помидор орлыкларын чәчәргә вакытмы?

Март уртасында теплицага күчерү өчен хәзер утыртырга мөмкин. Әгәр җылытылган теплица бар икән, бүген үк чәчеп була. Безнең теплицада җылы түтәл эшләдек: көздән 70 см җирне казып, катламлап тирес, көл, яфрак, ком, суган кабыгы, бройлер чистартканнан калган йон һәм ат тиресе салып җылыттык. Салкын көннәрдә өсләренә туннар каплыйбыз. Башкалар шулай эшли алмаса, март башы-уртасында чәчәргә кирәк. Борыч һәм баклажанны исә гыйнвар ахыры – февраль башында чәчәләр.

Колибри кыярын утыртканыгыз бармы? Аны үстерәсем килә.

Вакытында җыя алсаң, барысы да әйбәт. Мондый кыярларны көн саен карап барырга кирәк. Җәен эссе, коры һавада үрмәкүч көясе һөҗүм итә. Аларга каршы көрәшне яздан башлап, теплицага берничә төп бархатцы һәм календула утыртырга була. Шулай ук Битоксибаццелин һәм Фитоверм препаратлары белән профилактика үткәрегез. Суны 5 литрга 40 гр Битоксибаццелин һәм 50 мл Фитоверм кушып, бөтен үсемлеккә сиптерегез. Профилактика өчен эремчек суы һәм йод та өсти аласыз.

Тәнзилә апа, 15 көн элек сыер бозаулаган иде. Пычрагы чыксын өчен Утеротон ясарга буламы?

Әгәр пычраклары канлы яки үлекле икән, чистартыр өчен ясарга була. Әкренләп ак әйберләр килеп чыга икән, аналыкта ялкынсыну — эндометрит бар дигән сүз. Вакытында дәваламаса, хроник халәткә керә. Иртә 10 мл, кичен 10 мл биш көн дәвамында бирергә кирәк. Профилактика өчен генә, сыер тизрәк каплансын дип гормоннар куллану киңәш ителми.

Лилия Нурмөхәммәтова әзерләде