Энәле аппликатор белән дуслашыгыз, яки көн уңышлы үтсен дисәк...

Энәле аппликатор белән дуслашыгыз. Уянып, караваттан торып киткәнче, 7-10 минут энәле аппликатор өстендә ятып торыгыз. Әлеге иртәнге ритуал кан әйләнешен яхшырта, көне буена җитәрлек энергия бирә. 
Берочтан лимфатик система турында кайгыртып, ике гади генә күнекмә эшләп алыгыз. Аның берсе «Таракан» дип атала. Аркага яткан килеш, кулыгызны һәм аягыгызны күтәрегез дә җиңелчә генә селкетегез. 2-3 минут һәр көн шулай эшләгез. Икенчесе – күкрәккә бармак сөякләре белән массаж ясау. Түгәрәк хәрәкәтләр белән култык астына таба ясап төшегез. Сәламәт лимфа иммунитетны күтәрә, хатын-кыз сәламәтлегенә уңай тәэсир итә. 
Иртән авызыгызны бер чәй кашыгы кокос мае белән чайкатыгыз (өч-дүрт минут дәвамында). Кокос мае урынына зәйтүн яки җитен маен да кулланырга була. Аннары суга сода белән тоз кушып чайкатыгыз. Бу чаралар вирус һәм инфекцияләргә каршы торырга булыша.  
Иртән бер стакан җылы су эчегез. Ашказаны белән проблемасы булмаганнарга суга бер телем лимон яки әз генә алма серкәсе кушып эчәргә була.  
15 минут зарядка ясагыз. Ул йога да, сулыш гимнастикасы да булырга мөмкин.
Контраст душ керегез. Аннары тәнегезне сөлге белән яхшылап ышкып киптерегез. 
Иртәнге ашка кадәр теләсә нинди май эчегез (тмин, кабак, җитен һәм башкалар). Ашагач, 50 мл яңа сыгылган яшелчә согы яки смузи эчеп куегыз. 
Мөмкинлек булганда, эшкә җәяү йөрегез. 
Йокларга ятарга кимендә бер сәгать кала электрон җайланмалардан кулланмагыз. Эшләргә туры килсә, махсус компьютер күзлекләре киеп эшләгез. 
Ятар алдыннан бүлмәне җилләтегез.