Тәртипле булган өчен балага акча бирмәгез

Билгеле инде, бу зур суммалар булмаячак. Әмма кәнфит, туңдырма сатып алу өчен җитә торган булырга тиеш. Бала акча мәсьәләсендә үзен иркен тоярга тиеш һәм әти-әнисенә бәйле булмавын аңларга мөмкинлек бирә. Әйе, акча әти-әнисенеке, шулай да болай эшләгәндә бала үзен ирекле кеше итеп тоя алачак.
Кечкенә балалар әйберне әти-әнисе контроле астында сатып алырга тиеш, ди белгеч. Ул сезнең күз алдында товар өчен акча түләсен, артык акчаны санап алырга өйрәнсен һ.б.

Мәктәп яшендәге балаларга үз кирәк-яракларына тотар өчен балаларга акчаны даими бирергә мөмкин. Акчаны күпме һәм нинди вакыт аралыгына бирүегезне бала белән алдан сөйләшегез. Болай эшләгәндә ул үз чыгымнарын үзе планлаштырырга өйрәнәчәк.

Бала үзен тәртипле тоткан өчен генә акча бирергә ярамый. Гади итеп әйткәндә, үзеңне тәртипле тотсаң — 100 сум бирәм, юк икән — акча да булмаячак, дигән ысул кулланырга ярамый. Бу мәктәптәге билгеләргә дә кагыла. Баланы шул рәвешле стимуллаштыру аңа зыянга гына. Нәтиҗәдә ул акча бирмичә бер нәрсә дә эшләми торганга әйләнүе бар.

Акчаны бала бүләк итеп кабул итәргә тиеш түгел. Бу баланы олы кеше кебек бер дәрәҗәдә булуын күрсәтә торган факт. Бала акчаны тоту турында гына түгел, ә аның өчен җаваплы булуын да аңларга тиеш.

Баланың кирәк-яракларына бирелгән акчаны үзенә генә туздырырга тиеш түгеллеге хакында да сөйләшегез. Мисал өчен, әби яисә бабайга кечкенә генә бүләк алырга мөмкин. Шул рәвешле бала башкалар хакында да кайгыртырга өйрәнәчәк. "Без синең өчен бөтен нәрсәне дә эшлибез. Син безгә рәхмәтле булырга тиешсең”, дигән әйберләр сөйләмәгез. Бала рәхмәтле булырга кечкенәдән, сезнең үрнәктә, я өйрәнәчәк, яисә юк.

Туңдырма яисә кәнфиткә дип биргән акчаны җыеп барырга киңәш ителми. Бала билгеле бер сумманы тота алуын аңларга, үзенә нәрсәдә булса кирәк булган очракта, бу хакта әти-әнисе белән сөйләшә белергә тиеш. Мин чираттагы компьютер уены аласым килә, шуңа туңдырма ашамаячакмын дигән фикер дөрес булмаячак. Әлбәттә сүз үзләре акча эшли башлаган үсмерләр хакында бармый. Ул очракта, киресенчә, балага акча туплау механизмнарын аңлату кирәк.