Хәтерне югалтмауның 4 ысулы

Белгечләр искәртүенчә, акылга, баш миенә даими рәвештә йөкләнеш биреп торганда гына кешенең хәтере яхшы була. Мисал өчен, чит телләр өйрәнү, китап уку, кроссвордар, логик биремнәр чишү баш миендә яңа нейрон бәйләнешләр барлыкка китерә һәм баш мие эшчәнлеген тәртиптә тота. 

Бу мәсьәләдә туклану да мөһим роль уйный. Рационда антиоксидантларга һәм үсемлек аксымына бай булган ризыкларны кертергә тырышыгыз. Аерым алганда, җиләкләр, чикләвекләр, фасоль кулланыгыз. Бу продуктлар баш миендә яшькә бәйле үзгәрешләрне кичектерергә ярдәм итәр. 

Галимнәр раславынча, аралашу да хәтерне яхшырту өчен бик кирәкле фактор. Социаль элемтәләр баш миенең төрле өлешләрендә активлыкны сакларга ярдәм итә. Шуңа да дуслар, туганнар белән даими аралашып торырга, төрле очрашулардан баш тартмаска, тирә-юньдәгеләр белән аралашырга тырышырга кирәк, ди галимнәр. 

Хәтер яхшы булсын өчен йокы да сыйфатлы булу мөһим. Төнлә ял иткән вакытта баш мие көн дәвамында алган мәгълүматны эшкәртә, хәтерне "төпләп куя", матдәләр алмашу продуктларыннан арына. Йокы җитмәү киресенчә, хәтер начараюга, игътибарсызлыкка китерүе бар. 

Йокы сыйфаты, режимы хакында кайгыртырга, йоклар алдыннан гаджетлар куллануны киметергә киңәш ителә.