Ял өчен түләмәсәләр нишләргә?

Россия Хезмәт кодексы нигезендә, ял өчен түләүләр эшләми торган көннәр башланырга өч көн кала түләнелергә тиеш. Әгәр дә эш бирүче акчаны исәп-хисап счетыгызга ял башлангач та күчерми икән, профсоюга мөрәҗәгать итә аласыз.

Һөнәри союз булмаган очракта, дәүләт хезмәт инспекциясе ярдәмгә киләчәк. Мондый инспекцияләр Россиянең һәр субъектында да бар.
Моннан тыш, хезмәткәр прокуратурага гариза язарга хокуклы. Прокуратура эш бирүченең Хезмәт кодексын һәм законнарны үтәвен тикшерәчәк.

Прокуратура нинди карар кабул итүгә дә карамастан, гражданин хокукларын яклап судка да гариза яза ала. Бу шулай ук закон тарафыннан тыелмый.
Әмма белгечләр барлык органнарга да берьюлы түгел, ә чиратлап мөрәҗәгать итәргә киңәш бирә. 

Мөрәҗәгать (гариза) белән бергә, хокукларыгызны бозуны раслый торган документларны да беркетергә онытмагыз. Бу ялга чыгуыгызны хуплап эш бирүче имзалаган гариза күчерелмәсе, ял бирелү турындагы приказ, ял өчен түләнелергә тиешле сумма күрсәтелгән хисап кәгазе күчерелмәсе. Моннан тыш прокуратура һәм хезмәт инспекциясенә башка документлар да таләп ителергә мөмкин.

Фото: freepik.com