12 яшьлек кызның һәм 3 яшьлек малайның гәүдәсе табылган

Шәхси йортта 6 кеше гомер кичергән, шуларның 4есе бала.

Янгын 15 мартка каршы төндә килеп чыккан. 

Алабуга прокуратурасы матбугат хезмәте хәбәр иткәнчә, янгын чыккан вакытта өйдә өч бала белән әтиләре генә булган. 

30 яшьлек гаилә башлыгы һәм аның 8 яшьлек улын хастаханәгә тән җәрәхәтләре белән алып килгәннәр. Янгын сүндерү барышында 12 яшьлек кызның һәм 3 яшьлек малайның гәүдәсе табылган. Бу төндә әниләре һәм тагын бер бала өйдә булмаган.

Ут ике катлы йортны тулысынча юк иткән. Шулай ук янгында ишегалдында торган ике ВА3-2110 һәм «Сузуки Гранд Витара» автомобильләре янып беткән.
Бу вакыйганың сәбәпләре һәм шартлары ачыклана.