#Кыскача яңалыклар 28 июль 2026, 14:25

Табиблар могҗиза ясады: Казанда бер операция вакытында хатын-кыздан ике зур шешне алганнар

28 июль 2026, 14:25

66 яшьлек хатын-кызның гади генә булып күренгән бил авыртуы җитди диагнозга китергән.

Скопировать ссылку

Табиблар могҗиза ясады: Казанда бер операция вакытында хатын-кыздан ике зур шешне алганнар

66 яшьлек хатын-кызның гади генә булып күренгән бил авыртуы җитди диагнозга китергән.

Авырту шулкадәр көчәя, хәтта авыртуны баса торган даруларсыз түзеп булмый башлый. Шуннан соң ул Республика клиник онкология диспансеры белгечләренә мөрәҗәгать итә, дип хәбәр итте Татарстан Республикасы Сәламәтлек саклау министрлыгы башлыгы Альмир Абашев үзенең каналында.

Тикшерү нәтиҗәләре табибларны да гаҗәпләндерә: пациентның сул бөерендә – 16 сантиметрлы, ә уң күкәйлегендә 15 сантиметрга якын шеш табыла. Ике шеш тә бергәләп корсак куышлыгы белән кече оча сөяге өлкәсенең зур өлешен биләп алган була.

– Зур зурлыктагы шешләр тормыш өчен мөһим органнарны кыса иде. Хирургик дәвалауны кичектерергә ярамый иде, – дип аңлаткан Республика клиник онкология диспансерының 6 нчы бүлеге мөдире вазифаларын башкаручы Георгий Басиашвили.

Табиблар операцияне озакка сузмый. Пациентны урология бүлегенә салганнан соң, икенче көнне үк катлаулы симультан операция үткәрәләр. Ягъни бер операция барышында берьюлы ике зур шешне алалар.

Операция 3,5 сәгать дәвам итә. Хирурглар шеш зарарлаган сул бөерне, үсентеләре белән аналыкны һәм зур сальникның бер өлешен ала.

– Без сигез кулда эшләдек. Һәр хирург үз анатомик зонасы өчен җавап бирде. Команданың бердәм эше операцияне уңышлы тәмамларга мөмкинлек бирде, – ди хирург Рәшит Исламов.

Хәзер пациентның хәле яхшы. Ул тернәкләнеп, өенә туганнары һәм якыннары янына кайтып киткән.

Бил яки корсак өлкәсендәге озак вакыт дәвам иткән авыртуларны игътибарсыз калдырырга ярамый. Вакытында табибка мөрәҗәгать итү күп очракта сәламәтлекне генә түгел, гомерне дә саклап кала.

Кызыклы яңалыкларны күзәтеп бару өчен безнең МАХ каналына кушылыгыз.