#Кыскача яңалыклар 28 июль 2026, 14:33

Татарстанда иң зур яшьләр форумнарының берсе башлана: «Лига форум»га кемнәр килә?

28 июль 2026, 14:33

6-22 август көннәрендә Чаллының яңартылган «Следопыт» балалар лагерендә «Лига форум» белем бирү форумы узачак.

Скопировать ссылку

Быел ул өч сменада үтәчәк һәм Татарстан, Россия төбәкләре, шулай ук чит илләрдән килгән студентларны берләштерәчәк. Оештыручыларга 1600дән артык гариза килгән, һәр сменага 300дән артык яшь активист чакырылган.
Татарстан яшьләр эшләре министры Азат Кадыйров әйтүенчә, республикада студентлар форумы инде 2014 елдан бирле үткәрелә һәм шул вакыт эчендә аның катнашучылары саны 15 меңнән артып киткән.

– «Безнең өчен бу форум – гади белем бирү мәйданчыгы гына түгел. Биредә яшьләр командада эшләргә өйрәнә, лидерлык сыйфатларын үстерә, остазлар белән аралаша, традицион кыйммәтләр турында фикер алыша. Форумда катнашучылар киләчәктә республика яшьләр сәясәтенең иң актив вәкилләренә әвереләчәк», – дип билгеләп үтте министр.

Өч сменаның һәркайсының үз юнәлеше булачак. Беренче Татарстанның югары һәм урта һөнәри белем бирү йортлары студентларын җыячак, икенчесенә Россия төбәкләреннән студентлар киләчәк, өченче сменада чит ил студентлары катнашачак.

– Агымдагы ел Бердәмлек елы дип игълан ителде. Татарстан – күпмилләтле республика, бездә төрле илләрдән килгән яшьләр белем ала. Шуңа күрә өченче сменаны нәкъ менә чит ил студентлары белән хезмәттәшлеккә багышларга булдык. Барлыгы 43 илдән, – диде Азат Кадыйров.

Татарстан Студентлар лигасы президенты Шамил Якупов форумның елдан-ел киңәя баруын билгеләп үтте.

– Форум инде уникенче тапкыр үткәрелә. Ел саен анда 1200дән артык студент катнаша. Быел исә ул тагын да киңрәк форматта үтә – Россиянең төрле төбәкләреннән генә түгел, чит илләрдән дә яшьләр киләчәк, – диде ул.

Форумның белем бирү программасы бик бай булачак. Студентлар белән клиник психолог Максим Зрютин, «Алдынгылар хәрәкәте» рәисе киңәшчесе Тимур Сафин, сәяхәтче Ирина Попова, спортчы Иван Гапоненко, җырчы Даниил Корин һәм башка танылган белгечләр очрашачак. Шулай ук өченче сменага комик Айдар Гәрәевның да килүе көтелә.

Форум күңел ачу программасын да үз эченә ала. Һәр сменаның ачылышы һәм ябылышында танылган артистлар чыгыш ясаячак. Барлыгы алты музыкаль төркем чыгышы планлаштырылган. Форумның төп хедлайнеры – җырчы Мартин.

Кызыклы яңалыкларны күзәтеп бару өчен безнең МАХ каналына кушылыгыз.