1 сентябрьгә 43 мәктәптә капиталь ремонт эшләре төгәлләнә

Шулай ук 11 мәктәп тәүге тапкыр укучыларын каршы алачак, шуларның 4се башкалада. Бакча яшендәге балаларны да игътибарсыз калдырмыйлар. Социаль-мәдәни өлкә объектларында капиталь ремонт барышы турында Татарстан Республикасы Хөкүмәте йортында узган киңәшмәдә Татарстан Республикасы төзелеш, архитектура һәм торак-коммуналь хуҗалык министры урынбасары Алексей Фролов хәбәр итте.

Республикада мәгариф тармагында барлыгы 7 программа гамәлгә ашырыла. 43 мәктәптә төзекләндерү эшләре инде 80 процентка үтәлгән. 7 балалар бакчасында эшләрнең 72%ы башкарылган. Ашханәләрне ремонтлау программасы кысаларында төзүчеләр шулай ук җиң сызганып эшли. Буа, Әлмәт, Кайбыч, Кама Тамагы һәм Теләче районнарындагы 8 объект тулаем әзер.

Республиканың 9 ресурс үзәгендә дә капиталь ремонт эшләре тулы куәтенә бара. Бу атнада Әлки районында эшләр тәмамланган. Урта һөнәри белем бирү йортларының 4 тулай торагында шулай ук эш гөрли – төзелеш-монтаж эшләре 76%ка үтәлгән.

Гүзәл Насыйбуллина