Арчалылар Казанда җыела

Татарстанның Арча районы якташлыгы Казанда зур концерт-тамаша үткәрә. Биредә Арча төбәгендә туып үскән сәнгать осталары, бу районда яшәүче талантлар катнашачак. Югары вазыйфаларны биләүче арчалылар мәртәбәле кунак буларак чакырылган. Алар арасында Татарстан Дәүләт Советының икътисад, инвестицияләр һәм эшкуарлык комитеты рәисе Рафис Борһанов, республиканың Премьер-министры урынбасары - Авыл хуҗалыгы һәм азык-төлек министры Марат Әхмәтов, Татарстанның урман хуҗалыгы министры Алмас Нәзиров, шулай ук Арча районы хакимияте башлыгы Илшат Нуриев бар. Тамаша иртәгә 26 мартта Кәрим Тинчурин исемендәге Татар дәүләт драма һәм комедия театрында үтәчәк. Чара кичке сәгать 18.30 башлана.