#Кыскача яңалыклар 19 декабрь 2016, 11:39

Бер елда 57 журналист һәлак булган

19 декабрь 2016, 11:39

2016 елда үзенең һөнәри вазифасын башкарганда 57 журналист һәлак булган. Бу хакта "Репортеры без границ" оешмасы еллык тикшеренү нәтиҗәләрендә игълан иткән, дип яза "Татар-информ" ТАСС агентлыгына сылтама белән. Үткән ел дөньяда 67 журналистның гомере өзелгән булган.

Скопировать ссылку

Нигездә, журналистлар низаглы территорияләрдә эшләгәндә һәлак була. Беренче урында Сирия тора, анда 19 журналистның гомере өзелгән. Аннан соң - Әфганстан (10 кеше), Ирак (7 кеше) һәм Йемен (5 кеше) илләре килә.

Беренче тапкыр бу исемлеккә профессиональ журналист булмаган кешеләрне - блогерларны (9 кеше) һәм гаммәви мәгълүмат чаралары хезмәткәрләренә мәгълүмат биреп, шуның аркасында һәлак булган башка һөнәр ияләрен дә (8 кеше) керткәннәр.

Бу аянычлы исемлекнең узган елдагы белән чагыштырганда берникадәр кыскаруын журналистларның бүген Сирия, Ирак, Ливия, Йемен, Әфганстан, Бангладеш һәм Бурудни кебек хәвефле илләргә бармаска тырышуы белән аңлаталар. "Нәтиҗәдә әлеге дәүләтләрдән мәгълүматлар бик аз", - дип бәяли оешма.

Тикшеренүләр алып барылган соңгы ун елда, үз һөнәри вазыйфаларын башкарганда дөньяда барлыгы 780 журналист һәлак булган, дип белдерәләр.