Бишенче сыйныфта укучы кыз сыйныфташына пычак белән кадаган

Яшүсмерләр арасындагы конфликтның сәбәбе билгесез, ә нәтиҗәсе гаять аянычлы. Бер укучы кыз сыйныфташына пычак белән ташланган. Әлеге канлы фаҗигадән соң, һөҗүм итүче «Мин аны үтердем» дип класстагыларга кереп әйткән.
Зыян күргән кызның битендә 26, тәнендә - тагын 20гә якын тирән яралар бар. Бераздан соң һөҗүм итүченең әнисе зыян күргән кызның әтисенә: «Безне гафу итегез», - дип смс җибәргән. 
Кызлар арасында чыккан низаг турында сыйныфташлары берни белми. Прокуратура тикшерү үткәрә. Дустына һөҗүм иткән кыз салкын коралны пеналына салып кергән.

Мәскәү өлкәсе губернаторы Андрей Воробьев үзенең Телеграм-каналында язганча, 11 яшьлек кыз аңына килгән.
— Яралар бик күп, ләкин, бәхеткә, эчке органнарга зарар килмәгән. Ул бик күп кан югалткан, әмма балалар организмы нык, ул һичшиксез аякка басачак, - дип язган Воробьев.

Губернатор хәзерге вакытта зыян күргән баланың мөстәкыйль рәвештә сулавын хәбәр иткән, аның янәшәсендә әти-әнисе кизү тора, дип өстәгән ул. Воробьев Химки һәм Люберец медикларына башкарган  эшләре өчен рәхмәтен белдергән.

Сыйныфташына пычак белән һөҗүм иткән Мильвираның әнисе журналистларга биргән интервью өчен 15 миллион сум сорый, дип яза 360tv.ru сайты. Хатын-кыз әйтүенчә, ул бу акчаны зыян күргән Соняны дәвалау өчен күчерергә уйлый.

Башкача хатын-кыз сөйләшүдән баш тарта икән. Хәзерге вакытта зыян күргән яшүсмер Люберец өлкә хастаханәсенең реанимациясендә дәвалана, хәле авыр, ләкин тотрыклы, дип бәяләнә. Ә һөҗүм итүдә гаепләнелүче Мильвира психиатрия хастаханәсендә, аңа психиатрик экспертиза үткәрелә.

Шунысы аерым игътибарга лаек, пычак белән һөҗүм иткән кыз яше аркасында җәзага тартылмаячак. Бу очракта - аның әти-әнисенә административ җаваплылык билгели һәм баланы исәпкә ала алалар. 

Әмма экспертиза нәтиҗәләре буенча һөҗүм итүчедә психик тайпылышлар ачыкланса, мәҗбүри рәвештә дәвалануга (кайвакыт ул ике елга кадәр дәвам итә) салырга мөмкиннәр, дип яза Shot Телеграм-каналы.

Әлегә кыз психиатрия хастаханәсендә экспертиза нәтиҗәләрен көтә. Якынча бу 10 көн дәвам итәчәк. Әгәр дә бернинди тайпылышлар табылмаса, баланы өенә кайтарып җибәрәчәкләр. 

Тик мәктәп хезмәткәрләренә «Ваемсызлык» маддәсе буенча 5 елга кадәр иректән мәхрүм ителү куркынычы яный. Сыйныф җитәкчесен вакытлыча эшеннән алганнар.