Блогер Рөстәм Нәбиев Торатау тавына менгән: "Аяксыз да җирдә нык басып торып була икән!"

Бу хакта аларның дуслары Гөлнара Хәсәнова менә болай дип язган:

“Җәй – очрашулар, кунакка йөрешүләр, күңелле сәяхәтләр вакыты. Һәр җәй көчкенә генә бер гомер икәненә ышанасың, җәйләрне, иң матур вакытларны сагынасың.

Быелге җәйдә минем күптәнге хыялым тормышка ашты – Торатауга мендем. Мендем генәме?! Тауның башында көтелмәгән очрашу булды. Тетрәндем. Күңелем тулып, елап төштем.

Хәл болайрак булды. Курсташлар белән очрашуның икенче көнендә кайтырга җыендык. Озатырга чыккан дусларым, төркемдәшләрем Илшат белән Нәркәс: "Былтыр Торатауга барасым килә дип язган идең", - диде. Һәм Илшат: “Юк, әйдәгез, барып күреп кайтыгыз! Әйдә, Нәркәс, Гөлнарага Торатауны күрсәтик!"- дип ирләрчә карар чыгарып куйды. Без өчәү (хатыны Нәркәс, миң һәм ирем) аның артыннан иярергә генә калды.

Сезнең шундый дусларыгыз бармы?! Мин бик рәхмәтлемен аларга, сезгә Торатаудан зур рәхмәт! Хыялымны тормышка ашырдылар! Торатауга менгән чакта бер абый безгә: “Барыгыз, өскәрәк менегез! Анда Рөстәм килгән!"- диде. Мин – хыялый: “Гыйззатуллинмы?"- дип сорыйм. Сорау җавапсыз калды. Бары елмаеп үтеп китте.

Шулай барлык көчебезне туплап, бер-беребезне куәтләп, туктап ял итеп, менеп җиттек кенә, бер апа телефонында "Урал" җырын куеп җибәрде! Шундый киңлек, шундый хозурлык ачылды! Кул сузымында – Куштау, Йөрәктау! Стәрлетамак – яшьлек калам, уч төбендә генә.

Иң мөһиме: тауга Рөстәм Нәбиев менгән. Бар халык аның белән фотога төшә, соклану сүзләрен җиткерә. Без дә бардык янына. Ә ул гап-гади, сылу-чибәр ир-егет икән! Аяклары гына юк. Мин тоттым та сорадым:

- Арындыгызмы менгәндә?

- Юк, өйрәнгәнмен инде, - диде.

- Ә мин арыдым! Чак мендем, - дидем.

Рәхәтләнеп көлде. Сокландыргыч шәхес, какшамас рухлы, нык ихтыярлы кеше. Күпләргә үрнәк. Аяксыз да җирдә нык басып торып була икән!.."– ди язган Гөлнара.