Дәрвишләр бистәсендәге Сабантуйда 300дән артык артист чыгыш ясаячак

Дәрвишләр бистәсендәге мәйданда бәйрәм программасы 10:00 сәгатьтә башлана. Һәр кунакка чаралар планы белән исемлек өләшәчәкләр.

Сабантуй тарихына һәм гореф-гадәтләренә багышланган кереш өлештә 300 дән артык артистның катнашуы планлаштырыла. Сәхнәдә Ришат Төхвәтуллин, Артур Минһаҗев, Роман Плеханов, Илгиз Шәйхразиев, «Зөләйлә» вокаль триосы, «Ворожея» рус җыры театры һәм башкалар чыгыш ясаячак.

11:00 сәгатьтә мәйданда спорт ярышлары башлана. Милли татар көрәше буенча турнир була, анда чын батырны билгеләячәкләр.

«Татар ишегалды» мәйданчыкларын Балтач һәм Саба муниципаль районнары оештыра. Авыл халкы милли татар халык ризыкларын тәкъдим итәчәк, һөнәрчелек остаханәләре һәм мини-зоопарк эшли. Мәйданчыкта алты фотозона урнашачак, шул исәптән интерактив фотозона да була.

«Балалар мәйданы» зонасында милли костюмнарда аниматорлар һәм аттракционнар эше каралган. Бәйрәмнең кечкенә кунаклары милли уеннарда, бизәнү әйберләре һәм истәлекле бүләкләр ясау буенча мастер-классларда катнаша ала.

Быел бәйрәмне «Яшьләр Сабан туе»ның яңа мәйданчыклары бизәячәк, анда беренче мәртәбә «Сабан туе гүзәле — 2024» сайланачак һәм Идел буе халыклары гореф-гадәтләренә багышланган «Гаилә Сабан туе» мәйданчыгы эшләячәк. Моннан тыш, Дәрвишләр бистәсендә Сабантуйда «Осталар шәһәре», «Мунча йоласы», «Яңа буын», «Лазертаг», «Су Сабан туе» һәм башка тематик зоналар тәкъдим ителәчәк.