Әтиләр дә декретка чыгарга тели

Ир-атларның 27 проценты, балалары туган очракта, бала карау ялына китәргә ниятли. Тагын 16 проценты моңа ризалашыр иде.

Әтиләр өчен шартлар һәм пособиеләр әниләрнеке кебек. Бердәнбер нюанс шунда ки, әти-әнинең икесе дә бер үк вакытта декретта була алмый.

Бала яшь ярымга җиткәнче гаиләгә тиешле түләүләр күләме хезмәткәрнең уртача хезмәт хакының 40 процентын тәшкил итә. Шул ук вакытта пособиенең минималь күләме 8 591,47 сумга, максималь күләме 33 281,80 сумга тигез. 

"Шунысын да билгеләп үтәргә кирәк, эшче (ир-ат яки хатын-кыз мөһим түгел), бала карау буенча ялда булганда, тулы булмаган эш вакыты шартларында эшли ала һәм пособие белән бергә хезмәт хакының бер өлешен пропорциональ рәвештә ала ала. Шулай ук, теләгән очракта хезмәткәр теләсә кайсы вакытта отпускны туктатып, эш бирүчегә алдан хәбәр итеп, эшкә чыга ала», – дип өстәделәр SuperJob матбугат хезмәтендә.

Ирләрнең декрет ялы алу хокукы булса да, эш урынындагы җитәкчелек аларны декретка җибәрергә атлыгып тормый. Җитмәсә, бу очракта ирләрнең хокукы хатын-кызныкы белән тигез түгел. Кечкенә баласы булуга карамастан, ир кешене "кыскартырга", эшеннән азат итәргә мөмкин. Ә балалы хатынны эштән чыгарырга беркемнең дә хакы юк. Социаль һәм хезмәт хокуклары үзәге төзегән документ буенча исә, күчкенә бала белән өйдә утырган ирнең хезмәт урыны сакланырга, стажы барырга һәм декрет акчасы түләнергә тиеш. Норвегия, Швеция, Финляндия һәм кайбер илләрдә мондый механизм күптән кертелгән һәм бу гаилә өчен дә, ил өчен дә файдалы икән.