#Кыскача яңалыклар 06 август 2024, 14:27

Игътибар! Намаз вакытлары үзгәрә

06 август 2024, 14:27

Татарстан районнарында август аеннан ястү һәм иртәнге намазлар агымдагы елның маена кадәр гамәлдә булган вакытларда укыла башлый.

Скопировать ссылку

Искәртеп узыйк: май ае башыннан алып (Казан өчен 4 майдан башлап) август башына кадәр, безнең төбәкнең географик үзенчәлекләрен истә тотып, шәфәкъ аклыгы иртәнге таң аклыгы белән кушыла – төн дәвамында офыкта аклык югалмый һәм шул сәбәпле ястү намазының вакыты керми, ә иртәнге намазның вакытын күз белән күреп (визуаль рәвештә) билгеләп булмый.

Моны истә тотып һәм ислам галимнәре фикерләренә таянып, намаз вакытларын сәгать ярдәмендә билгеләү турында карар кабул ителгән иде, ястү намазы – кояш баеп сәгать ярым узганнан соң, ә сәхәр вакыты һәм иртәнге намазның башы кояш чыгарга ике сәгать кала куелган иде.

Намаз вакытларындагы үзгәрешләр беренчеләрдән булып Татарстанның көньяк районнарында күзәтелә. Казан шәһәрендә намаз вакытында үзгәреш 7 августка туры килә, бу көнне ястү 22:07 сәгатьтә, 8 августта исә иртәнге намаз вакыты 00:09 сәгатьтә керә.

Югарыда язылганнарны истә тотып, ястү һәм иртәнге намаз вакытларындагы үзгәрешкә игътибар юнәлтүегезне сорыйбыз, диелә Татарстан мөселманнары диния нәзарәте матбугат үзәге хәбәрендә.

Кызыклы яңалыкларны күзәтеп бару өчен безнең МАХ каналына кушылыгыз.