Илһам Шакиров Татарстан Республикасының “Фидакарь хезмәт өчен” медале белән бүләкләнде

Татарстан Республикасы Президенты Рөстәм Миңнеханов Россия Федерациясе һәм Татарстан Республикасы халык артисты, Габдулла Тукай исемендәге Татарстан Республикасы Дәүләт премиясе лауреаты Илһам Шакировка Татарстан Республикасының "Фидакарь хезмәт өчен" медален тапшырды.

Рөстәм Миңнеханов мәшһүр җырчыны 80 яшьлек юбилее белән котлап татар мәдәниятен үстерүдә күпьеллык иҗади хезмәте өчен рәхмәтен белдерде. Моннан тыш, Татарстан Президенты юбилярга "Форд Мондео" автомобиле ачкычларын тапшырды.

13 март көнне Мәскәүнең Дәүләт Кремль сараенда Илһам Шакировның юбилей концертын уздыру планлаштырыла. Чара Татарстан Республикасы Хөкүмәте һәм Татарстан Республикасы Мәдәният министрлыгы ярдәме белән узачак.

^{Фото prav.tatarstan.ru сайтыннан алынды}