Илгиз Зәйниев юллама турында: «Максатлар һәм бурычлар төгәл әйтелде»

«Максатлар һәм бурычлар төгәл әйтелде, барыбызга да үз юнәлешендә актив эшләргә кирәк. Куйган максатларның башкару юлларын, җайларын табарга», – дип белдерде режиссер.

«Бер юнәлешне дә аерып әйтә алмыйм. Җәмгыять өчен әлеге юнәлешләр барысы да бик мөһим. Рөстәм Нургалиевич берсен дә читләтеп үтмәде, барысын да атады, аерым игътибар бирде», – диде Илгиз Зәйни.

Режиссер шулай ук республикада театрларга бирелгән игътибар дәрәҗәсенең югарылыгын искәртте, җитәкчелеккә рәхмәт белдерде.

«Россия буенча күп йөрергә туры килә, ләкин төгәл әйтә алам, бездәге кебек театрларга игътибар беркайда да юк. Безгә бары тик үз эшебезне эшләргә генә кирәк. Дәүләт тарафыннан барысы да бирелә, ярдәм күрсәтелә, театрлар төзелә. Безнең театрларга бирелгән игътибар бүтән бер җирдә дә юк», – дип белдерде Илгиз Зәйни.

Чыганак: Татар-информ