#Кыскача яңалыклар 27 апрель 2023, 13:02

Кариев театры «Арлекин» фестиваленең махсус премиясенә лаек булды

27 апрель 2023, 13:02

Кичә, 26 нчы апрельдә Санкт-Петербург шәһәрендә XX «Арлекин» Россия Милли театр премиясенең бүләкләү тантанасы булды. Г.Кариев исемендәге Казан татар дәүләт яшь тамашачы театрының «Камыр батыр» спектакле (режиссеры Марфа Горвиц) жюриның махсус премиясенә лаек дип табылды.

Скопировать ссылку

«Камыр батыр» әкияте буенча сәхнә әсәре танылган драматург Алексей Житковский җитәкчелегендә «Бер әкият лабораториясе» кысаларында балалар белән бергә иҗат ителде. Нәкъ менә балалар халык әкиятенә яңа сулыш өрде. Фестивальнең жюри әгъзалары «Камыр батыр» спектаклен бүләкләгәндә дә шул үзенчәлекне ассызыклады. «Балалар һәм яшьләр театрында заманча яңа сәнгати алымнарны эзләгән һәм кулланган өчен» тапшырылды театрга мәртәбәле «Арлекин» дипломы.

Спектакль «Бердәм Россия» партиясенең «Театр – балаларга» федераль проекты кысаларында Россия Федерациясе Хөкүмәте гранты ярдәмендә сәхнәләштерелде.

Бу – Кариев театрының «Арлекин»да икенче тапкыр катнашуы. XVIII «Арлекин» театраль фестивалендә «Хикмәт әкиятләре» спектакле «Спектакльнең үзенчәлеге һәм сәнгати бөтенлеге өчен» фестиваль дирекциясенең махсус премиясенә ия булган иде. Шулай ук «Иң яхшы ир-ат роле» номинациясендә Сукыр падишаһның кече улы һәм Кара Сәйфи образлары өчен Эльдар Гатауллин җиңү яулады.

Кызыклы яңалыкларны күзәтеп бару өчен безнең МАХ каналына кушылыгыз.