Кашпировский кайткан!

Янәсе шул рәвешле кешеләрне төрле авырулардан дәвалый ала. 

Дәвалаучы 1989 елда таныла. Советлар Союзының соңгы елларында Кашпировский Үзәк телевидение каналында үз тапшыруының берничә чыгарылышын үткәрә. Аның барышында имеш телевизор караучыларны төрле авырулардан тылсымлы рәвештә дәвалый ала. Наркозсыз хирургик операция үткәрергә ярдәм итүләре аңа аеруча дан китерә.

Экстрасенс чыгышларын 300-500 кешелек концерт залларында уза. Тамашачыларны дәвалау өчен Кашпировский кешеләрне сәхнәгә берәм-берәм чакыра һәм кыска әңгәмәдән соң егылырга команда бирә икән. Соңгы чыгышларының берсендә Кашпировский тамашачыларга артык авырлык һәм аритмияне җиңәргә ярдәм иткән имеш. Моннан тыш, шоумен күрү сәләтен дәвалау белән шөгыльләнә һәм моның өчен Александр Малинин башкаруында «Ночь светла» җырын куллана. Бу катаракта, күз белән проблемалары булган пациентларга ярдәм итә, ди. 

Моннан тыш, шоумен «гаҗәеп нәтиҗәләр бирә торган» тоз төргәкләре һәм башка магик чуп-чар да сата. Мәскәүдә Кашпировский сеансына иң арзан билет 3 мең сумнан артык тора. Бу акчага “дәвалаучы”ны залның читеннән генә күзәтеп булачак. Сәхнәгә якынрак урыннарның бәясе 5 меңнән башлана, ә беренче рәткә билет өчен 9 мең түләргә туры киләчәк.  Кашпировский белән шәхси сеанс бәясе 25 мең сум, ә дәвамлылыгы билгесез.

Дүрт көн чыгыш ясап та Кашпировский алты миллион сумга якын акча эшләгән дип хәбәр итә “Лента.ру” порталы. Шул ук вакытта Кашпировский янәсе рәсми рәвештә бизнес алып бармый. Акчаны картага күчерү яки кулга бирүне өстен күрә. Шоуменның еллык кереме билгесез.