Казан — Адлер поезды һәлакәте: «Бу ялга барыр өчен акчаны бер ел җыйдык»

Кемдер ял итү өчен ел буе акча җыйган, кемдер кунакханәләрне яки кунак йортларын броньга куйган, ә кемдер эшкә юл тоткан.

Казан-Адлер поезды пассажирларының көньякка булган сәяхәткә өметләре өзелде. Волгоградтан көньякка таба 200 чакрым чамасы баргач, поезд тимер юл кичүенә чыккан КАМАЗга килеп бәрелә, шуның аркасында тугыз вагон рельслардан төшә. Бер мизгелдә пассажирлар һәм аларның әйберләре бөтен состав буйлап чәчелә. Гадәттән тыш хәл аркасында йөздән артык кеше зыян күргән, аларның берничәсе авыр хәлдә, ә хатын-кызларның берсенең аягы тимер астында калган. Ниндидер могҗиза белән беркем дә үлмәгән. 

«Җир тетрәве белән бер булды»
Жутово станциясе, Волгоград өлкәсе. Казан-Адлер поезды монда нибары 2 минут туктап торган, һәм проводниклар хәтта тәмәке тартучыларны да чыгармаган. Тәрәзә артында түзеп булмаслык эсселек, төшке аш вакыты булганга күп кенә пассажирлар, кондиционерлар астына урнашып, пешкән йомырка, каклаган тавык һәм казылыкка үрелә. Ләкин бер мизгелдә барлык пассажирлар үзләренең стаканнарын һәм телефоннарын төшереп җибәрә
— Мин 6 нчы номерлы вагонда идем. Поезд чайкала башлады да, мин егылдым, - дип кыскача гына сөйләгән зыян күрүчеләрнең берсе.

Пассажирларның төрле якка чәчелгән шәхси әйберләре, урын-җир, матрас һәм мендәрләре ауган вагоннар янында Азалия исемле кыз басып тора. Ул тумышы белән Башкортстаннан, әмма Казанда эколог белгечлеген ала икән. Адлерга студентлар отряды белән эшләргә барышы. Бәхеткә, зыян күрмәгән. 
— Әйберләрем анда калды, - дип сөйләгән Азалия. - Документларым да, телефоным да шунда. Туганнарыма вакытлыча урнашу пунктыннан шалтырата алдым. Безне балалар бакчасына алып киттеләр, шунда урнаштырдылар, ашаттылар. Волонтерлар миңа әйберләр табарга ярдәм итәргә теләделәр, шуңа күрә мин поезд янына кайттым. Ләкин әлегә вагоннарга кертмиләр.

«Мин тоткага тотындым, еладым һәм аны җибәрергә теләмәдем»
Вагоннарның бер өлеше рельсларда калган, фаҗигадән соң озак та үтмәстән әйләнгән вагоннарны аерып, икенче локомотивка тоташтыру өчен якындагы станциягә җибәргәннәр.

Рәсми мәгълүматлар буенча, 140 кеше зыян күргән, шуларның 8е балалар. 55 кеше Котельниково үзәк район хастаханәсенә озатылган. Камаз йөртүчесе, машинист ярдәмчесе һәм тагын бер поезд пассажиры - авыр хәлдә.

- Без 2 нче номерлы вагонда идек. Кондиционер, кайнар су белән бойлер һәм бәдрәф эшләмәде, - дип сөйләгән Софья Долгова. – Шуңа күрә без башка вагоннарга йөрдек. Бәрелешкән вакытта без 7 нче номерлы вагонда идек. Кондиционер астында утырырга теләдек. Кинәт туктап калганны сиздек, дустыма шаяртып: «Без рельслардан төштек», - дип шаярттым. Көлештек, һәм бер секундтан соң безнең вагон ауды. Без аскы урыннарда утыра идек. Егылган вакытта кулым белән тоткага тотындым да башым белән тимер элгечкә бәрелдем. 

Кызлар, бәхеткә, зыян күрмәгән. 
— Кинәт кемдер кычкыра башлады, кемдер елый башлады, кешеләрдә паника башланды, – дип искә ала Мария Токарева. - Барлык пассажирларга смс килде, аларга Россия тимер юлларыннан 24 000 бонус исәпләнгән. Бу компенсациянең бик сәер формасы. Трансфер буенча алга таба нәрсә булачагы да аңлашылмый, беркем дә берни әйтми. Без менә больницада күпме утырабыз инде. Безнең билетлар иминиятләштерелгән кебек, әмма безгә иминият компаниясенә мөрәҗәгать итәргә киңәш иттеләр. Без бит моңа гаепле түгел. Ә безне, күрәсең, хәзер нидер исбатларга, кәгазьләр җыярга, иминият компаниясенә мөрәҗәгать итәргә мәҗбүр итәчәкләр. Менә хәзер киләчәктә поездда йөрергә теләмим, миндә психологик җәрәхәт. Бу 24 000 бонуска поездда беркая да бармаячакмын, самолет белән очачакмын.