#Кыскача яңалыклар 24 октябрь 2018, 13:24

Комсомол ялкыны опера-балет театрын яктыртачак

24 октябрь 2018, 13:24

Кызыл тышлы әлеге кенәгә элек совет илендә яшәүче 14- 28 яшьлек һәр егет-кызның түш кесәсендә кадерләп саклана иде.

Скопировать ссылку

Комсомол билеты. Ул синең Ленин исемендәге Бөтенсоюз яшьләр оешмасы әгъзасы икәнеңне күрсәтеп тора. Бик күп яшь батырлар аны гомерләре бәрабәренә саклады. Пуля тишкәләгән, кан тамчылары сеңгән комсомол билетлары узган дәһшәтле чорлар истәлеге булып музейларда һаман да саклана. Ә менә бүген минем алдымдагылары чын билет түгел, әлеге оешманың 100 еллыгына багышланган тантанага (ул Муса Җәлил исемендәге опера-балет театрында бүген 16 сәгатьтә була) чакыру билеты. Республика комсомол ветераннары берләшмәсе, бу бәйрәмне оештыручылар чакыру кәгазьләрен комсомол билетына охшатып ясап, бик дөрес эшләгәннәр. Ул совет илендә яшәгән, коммунизм төзибез дип хыялланып йөргән һәркемгә бик кадерле, йөрәкләрдә комсомол ялкыны дөрләгән яшьлегебез истәлеге.Бигрәк тә, комсомол тормышында актив катнашканнар, әлеге ялкынны бүген дә сүндерми саклый алган картаймас күңелләр өчен. Нәкъ менә шундыйлар башкалабыз үзәгендәге мәшһүр театр залын тутырыр дип өметләнәләр оештыручылар. Республиканың Һәрбер районыннан вәкилләр килү көтелә. Соңыннан “Корстон”да буыннар очрашуы булачак.

Кызыклы яңалыкларны күзәтеп бару өчен безнең МАХ каналына кушылыгыз.