Мэр Илсур Метшин: «Ярдәмгә мохтаҗ балаларның барысына да букчалар тапшырылачак»

Яңа уку елы алдыннан, матур традиция буенча, Татарстан башкаласында “Мәктәпкә җыенырга ярдәм ит!” хәйрия акциясе уза. 
– Быел Казанның 1,6 мең кечкенә укучысы канцелярия товарлары тутырылган мәктәп портфеле алачак. Акция 17 ел рәттән оештырыла, колачын елдан-ел киңәйтә бара. Соңгы өч елда гына да 3,6 мең балага букча бүләк ителде, – диде Казан шәһәр Башкарма комитетының мәгариф идарәсе җитәкчесе Ирек Ризванов мэриядә үткәрелгән киңәшмәдә.

Башкала мэры Илсур Метшин акцияне хуплап фикерен әйтте.
– Бу чарада һичшиксез катнашачакбыз. Ярдәмгә мохтаҗ балаларның барысына да букчалар тапшырылачак. Алар беренче мәртәбә 1нче сыйныфка яхшы кәефтә барсыннар”, – диде мэр Илсур Метшин.

Букчалар һәм канцелярия товарлары алуда Казандагы предприятиеләр һәм коммерция оешмалары җитәкчеләре, Татарстан Республикасы Дәүләт Советы һәм Казан шәһәр Думасы депутатлары ярдәм күрсәтә. Акциядә хәйрияче сыйфатында теләге булган һәр кеше катнаша ала.