Миңнеханов Силуановтан субсидияләр мәсьәләсен контрольдә тотуны сорады

атарстан Президенты Рөстәм Миңнеханов Россия финанслар министры Антон Силуанов катнашында узган республиканың Финанслар министрлыгы, Россия федераль салым хезмәтенең һәм Федераль казначылыкның Татарстан буенча идарәләренең уртак коллегия утырышында шулай дип белдерде. Бу хакта "Татар-информ" хәбәр итә.

Республика лидеры билгеләп үткәнчә, Татарстанның киләсе ел бюджеты 7,6 миллиард сум дефицит белән формалашкан.
- Мәҗбүри медицина иминиятләштерү федераль фондыннан субсидияләр буенча сораулар кала бирә. Бу мәсьәлә чишелеш тапмады. Сезне шуны шәхси контрольгә алуыгызны сорыйбыз, - дип мөрәҗәгать итте Рөстәм Миңнеханов финанслар министры Антон Силуановка.

Соңгы 11 айда республикада барлык дәрәҗә бюджетларга 618,7 миллиард сум акча җыелган - бу бюджетларның салым һәм салым булмаган керемнәре. Ел нәтиҗәләре буенча ул 680,6 миллиард сумга җитәр дип көтелә. Татарстанның финанс министры Радик Гайзатуллин сүзләренчә, чыгымнарны үтәү кысаларында 2016 елда беренче чираттагы һәм социаль әһәмияттәге юнәлешләр төп урынны алып тора, ә аларга бюджетның 70 проценты карый.

Керемнәрне мобилизацияләү буенча Татарстан Россия субъектлары арасында бишенче һәм Идел буе федераль округында беренче урын алып тора, дип басым ясап әйтте министр.

Быел федераль бюджеттан барлыгы 5,7 миллиард сумлык бюджет кредитлары алынган. 2,2 миллиард сум кайтарылган.

- Республика федераль бюджет кердитларын кайтару буенча федераль бюджет алдында үзенең барлык бурычларын да вакытында үти. Федераль кредитлар җәлеп итү өчен Россия Финанслар министрлыгы белән Татарстан Министрлар Кабинеты арасында тиешле килешүләр төзелгән иде, аларда республика бюджеты өчен аерым индикаторлар билгеләнгән. Ел нәтиҗәләре буенча андагы барлык индикаторлар да үтәләчәк, - диде министр.