Мәктәпкә әзерләнергә ярдәм итик

Кызганыч, барлык гаиләләрнең дә финанс мөмкинлекләре бертөрле түгел. Республикада аз керемле гаиләләргә ярдәм йөзеннән, «Мәктәпкә әзерләнергә ярдәм ит!» акциясе бара. Татарстан Диния нәзарәтенең «Зәкят» хәйрия фонды да әлеге акция кысаларында республикадагы күпбалалы, аз керемле һәм инвалид балалы йөз гаиләгә ярдәм күрсәтүне үзмаксат итеп куйган. Йөз гаиләдәге укучы балага мәктәп киеме, хезмәт дәресе өчен тупланма, уку кирәк-яраклары тапшырылачак. Мохтаҗ гаиләләр йөздә генә бетсә икән дә бит. Битараф булмаган казанлылар дәфтәр, карандаш һәм мәктәп өчен кирәкле башка әйберләрне Тукай урамындагы 3нче йорттагы 304нче офиска китерә ала.
Казан шәһәре башкарма комитетының мәгариф идарәсе җитәкчесе Илсур Һадиуллин: «Без тормышта ирешкән үрләребез белән ата-аналарыбызга һәм белем алган мәктәбебезгә бурычлы. Башкаладагы эре предприятиеләр, депутатлар, эшкуарлар һәм киң күңелле казанлылар «Мәктәпкә әзерләнергә ярдәм ит!» һәм «Белем алган мәктәбеңә ярдәм ит!» акцияләрендә актив катнашалар. Бу игелекле гамәлләре өчен аларга зур рәхмәт! Мөмкинлекләре булган кешеләр ниятләп кенә калмасыннар, мохтаҗ гаиләләрдәге укучы балаларны сөендерсеннәр иде», - диде.