Мәскәүне яклап һәлак булган татарстанлыларның Хәтер китабы чыгачак

Россия Журналистлар берлеге әгъзасы Әнвәр Софиновның "Алар Мәскәү янында һәлак булды" Хәтер китабы (1941-1942 елларда Мәскәүне яклап һәлак булган Татарстан кешеләре исемлеге)" социаль-патриотик проекты грант отты, дип хәбәр итә "Татар-информ" Мәскәү өлкәсенең Татар милли үзәге матбугат хезмәтенә сылтама белән.

Милли-мәдәни мохтариятнең әлеге проекты Мәскәү өлкәсе Татар милли үзәге һәм Казандагы Бөек Ватан сугышы музей-мемориалы белән берлектә тормышка ашырылачак, чөнки дистәләгән, йөзләгән кеше һаман да Бөек Ватан сугышында һәлак булган туганнарының кайда җирләнгәнен белми.

Бу китап басылып чыккач, аны Мәскәү өлкәсе һәм Татарстанның дәүләт музейларына һәм китапханәләренә таратырга ниятлиләр. Мәскәү өчен сугышка 75 ел тулуга багышлап нәшер ителәчәк китап шулай ук Татарстан белән Мәскәү өлкәсе арасында сәүдә-икътисади, фәнни-техник, социаль һәм мәдәни хезмәттәшлек турындагы килешүне үтәүдә чираттагы гамәл булачак.

Хәзерге вакытка Мәскәү өчен сугышта һәлак булган һәм хәбәрсез югалган 2500 татарстанлы турында мәгълүмат тупланган.