Путин хезмәт хакларын арттырырга вәгъдә итте. Кемнәрнекен һәм күпмегә?

"1 апрельдән төбәкләр барлык медицина хезмәткәрләренең хезмәт хакы окладын 50 процентка кадәр арттырырга, шул ук вакытта өстәмә түләүләрне саклап калырга тиеш. Без һәрвакыт хезмәт хакының фиксацияле өлеше тәэмин ителергә тиешлеге турында сөйлибез. Өстәмә түләүләр шулай ук мөһим. Әмма медицина хезмәткәрләрен, әлбәттә, төп өлеш, оклад югарырак булуы кызыксындыра, дип белдерде ул Булачак технологияләр форумының пленар утырышында. Бу хакта "Ведомости" яза. Хөкүмәт исә, үз чиратында, ОМС системасында эшләүче федераль оешмаларның медицина хезмәткәрләренә карата шундый ук карар әзерләргә тиеш. Моннан тыш, Президент беренчел звено медицина хезмәткәрләре өчен айлык түләүләрне арттырырга вәгъдә итте. Аның сүзләренчә, 13 февральдә хөкүмәт белән киңәшмәдә алар 1 марттан кече шәһәрләр, район үзәкләре һәм авыллардагы медицина хезмәткәрләре өчен айлык түләүләрнең күләмен арттырырга килешкәннәр. "50 000 нән 100 000 гә кадәр кеше яшәгән шәһәрләрдә табиблар өстәмә рәвештә, төп хезмәт хакыннан тыш, 29 000 сум алачак, урта медицина персоналы - 13 000 сум. 50 000 нән кимрәк кеше яшәгән торак пунктларда мондый түләүләр шактый югары булачак: ай саен хезмәт хакына өстәмә рәвештә табиблар - 50 000 сум, урта звено медицина хезмәткәрләре 30 000 сум алачак", - дип белдергән Путин. Шул ук вакытта Президент билгеләп үткәнчә, хөкүмәткә карар әзерләү өчен вакыт кирәк булачак, шуңа күрә медицина хезмәткәрләре бу түләүләрне март ае өчен 1 апрельдән алачак.