#Кыскача яңалыклар 09 март 2023, 16:11

Һәр юл һәлакәтенең өченчесендә балалар гаепле

09 март 2023, 16:11

Узган ике ай эчендә республика территориясендә теркәлгән юл-транспорт һәлакәтләре, аларда үлүчеләр, имгәнү алучылар саны кими төшкән. Ә шул ук вакытта балалар катнашындагы юл һәлакәтләре, алар арасында имгәнү алучылар һәм үлүчеләр саны, киресенчә, арта гына.

Скопировать ссылку

Агымдагы елның гыйнвар-февраль айларында Татарстанда балалар катнашында 44 юл-транспорт һәлакәте теркәлеп, аларда 2 баланың гомере өзелгән. 49ы төрле авырлыктагы тән җәрәхәтләре алган. Әлеге күңелсез саннарны бүген журналистлар белән очрашуда ТР буенча ЭЭМ ЮХИДИ идарәсе башлыгы Рөстәм Гарипов яңгыратты.

Ике ай эчендә юлларда зыян күргән балаларның төп өлешен 7-14 яшьлекләр тәшкил итә. Юл хәрәкәте иминлеге буенча баш дәүләт инспекторы балигъ булмаганнар катнашындагы юл һәлакәтләренә еш кына өлкәннәрнең ваемсызлыгы сәбәп була, дип искәртә. Балаларны машинага утыртып юлга чыккан өлкәннәр саклык кагыйдәләрен җиренә җиткереп үтәми.

Рөстәм Гарипов сүзләренннән аңлашылганча, юллардагы һәр 3 бәхетсезлек очракларының берсе балалар гаебе белән чыга. Баш дәүләт инспекторы моны ЮХИДИ, мәгариф системасы һәм ата-аналарның балигъ булмаганнар белән профилактик тәрбия буенча эшләп бетермәве нәтиҗәсе, дип саный. Аның белдерүенчә, гомумән алганда, 2022 елда республикада балалар катнашындагы юл-транспорт һәлакәтләре саны кими төшсә дә, бу бик аз, динамик кимү түгел. Өстәвенә, балалар травматизмы һаман да актуаль булып кала.

Кызыклы яңалыкларны күзәтеп бару өчен безнең МАХ каналына кушылыгыз.