Россиягә мигрантлар кайдан киләләр?

Росстат мәгълүматлары буенча, 2023 елда Россиягә килгән халыкара мигрантларның 55 проценты — ирләр, 45 проценты — хатын-кызлар. Аларның 76 проценты эшкә яраклы яшьтә.

Узган ел Россиягә килгәннәрнең күбесе - Таҗикстанда туганнар (31%). Сан буенча икенче урында Кыргызстаннан килүчеләр (10%), өченче урында Украина, Әрмәнстан һәм Казахстан (9%), дүртенче урында Үзбәкстан (4%) тора. Росстат билгеләп үткәнчә, халыкара мигрантларның 40 проценты Россия гражданнары булып тора.

Росстат мәгълүматларыннан күренгәнчә, чит илдән килүчеләр арасында никахта торучыларның өлеше югары – 51 процент. Килүчеләрнең 28 проценты беркайчан да кияүгә чыкмаган яки өйләнмәгән, 5 проценты аерылышкан, 3 проценты тол калган.
Россиягә килгән чит ил гражданнарының төп өлеше урта гомуми белемле (39%). Икенче урында – урта һөнәри белем алучылар (22%). Югары һөнәри белем 9 процент читтән килүчеләрдә бар. Башлангыч сыйныфлар дәрәҗәсендә белем алуны яки аның бөтенләй булмавын Росстат 1,9 процент мигрантлар арасында теркәгән.

Эчке эшләр министрлыгы мәгълүматлары буенча, 2024 елның гыйнвар-июлендә Россиядән закон бозган 65 мең чит ил кешесен кире туган якларына җибәргәннәр, Россиягә керү тагын 120 мең чит ил гражданы өчен ябык булган.