Рөстәм Миңнеханов Карелиядәге татар җәмәгатьчелеге вәкилләре белән очрашты

Татарстан Республикасы Президенты Рөстәм Миңнеханов Карелиядәге татар җәмәгатьчелеге вәкилләре белән очрашты. Әлеге чарада Карелия башлыгы Александр Худилайнен катнашты. Ул республикада милли берләшмәләргә күрсәтелә торган ярдәм турында сөйләде, Карелиядә яшәүче 150 милләт арасында саны буенча татарлар җиденче урында торуын белдерде.

Рөстәм Миңнеханов бөтен дөнья буенча татарлар берләшүенә һәм туган телләрен, гореф-гадәтләрен саклауга ярдәм итүче проектлар турында әйтеп узды.

Очрашуда мәдәният, сәнгать һәм яшьләрне тәрбияләү өлкәсендә уртак проектларны гамәлгә ашыру мәсьәләләре турында сөйләштеләр. Моннан тыш, Карелиядә татар халык бәйрәме Сабан туен уздыру, татар авторлары пьесаларын кую, иҗади коллективлар гастрольләрен оештыру мәсьәләләре турында да сүз барды, дип хәбәр итә Татарстан Республикасы Президенты матбугат хезмәте.

^{Фото prav.tatarstan.ru сайтыннан алынды}