Рөстәм Миңнеханов Татарстанның югары вазифаи заты атамасын үзгәртүне якларга өндәде

–    Тема гади түгел. Әмма карар кабул итәргә тиешбез. Мин сезне тулысынча аңлыйм. Республика җитәкчесе атамасын саклап калу буенча эшләдек. Ике срок республика Президентын сайладык. Башка юллар да эзләп карадык. Минем дә, сезнең тырышлык та җитәрлек булмагандыр. Без бу позицияне протест юлы белән түгел, закон белән якларга тиеш. Төрле фикерләр булды монда. Алга таба хәрәкәт итәр өчен карар кабул итәргә кирәк. Гел син теләгәнчә генә булмый, тик юлларны табу зарур. Бүгенге кәеф аңлашыла. Битараф булсак, начар булыр иде. Федераль үзәк белән ачуланышырга түгел, халык иминлеген кайгыртырга кирәк, - диде ул Татарстан Дәүләт Советының утыз тугызынчы утырышында.