Салават Күпере паркында беренче тапкыр җәмәгать бакчасы эшли башлаячак

29 нчы апрельдә Салават Күпере микрорайонындагы паркта беренче тапкыр җәмәгать бакчасы ачылачак. Шәһәрлеләр чәчәкләр, яшелчәләр, җиләкләр утырта, аларны карый һәм сентябрьдә уңыш җыя алачак.

Салават Күперендәге җәмәгать бакчасы 2 ябык теплица һәм 4 ачык кисмәкне үз эченә ала. Аларның вакытлыча хуҗасы булу өчен заявка тутырырга кирәк. Анкеталарны өйрәнәчәкләр һәм тәкъдим ителгән участокларда бакчачылык белән шөгыльләнү өчен 18 кеше сайлап алыначак. 

Җәмәгать бакчасын ачу тантанасы 29 нчы апрельдә 14:00 сәгатьтә планлаштырылган, дип хәбәр ителә җәмәгать киңлегенең Telegram-каналында. 

Шулай ук 29 нчы апрельдә 12:00 сәгатьтә яшеллек сөючеләр өчен бүлмә үсемлекләрен күчереп утырту буенча мастер-класс үткәреләчәк. Ул Салават Күпере паркы теплицалары янында узачак. Open Space Market һәм «Табигать» брендына нигез салучы, үсемлекче Юлия Турайханова туфракны дөрес сайлап алу, үсемлекләрне күчереп утыртуга әзерләү һәм аларны дөрес карау турында сөйләячәк. 

Мастер-класска күчереп утыртуга мохтаҗ булган үз үсемлегеңне һәм аның өчен чүлмәк, шулай ук карау буенча киңәшләр алу өчен йорт үсемлекләренең фотоларын алып килергә мөмкин. Мастер-класс шәһәр халкы өчен бушлай үткәрелә, теркәлү таләп ителә, дип хәбәр итә Казан мэриясе сайты.