Сирена нинди хәбәр ирештерә?

Шунысы да бар: әлеге вакыйга Татарстанда хәбәр итү системасы тикшерелгән көнгә дә туры килде. Шуңа күрә журналистларны күбесенчә Гадәттән тыш хәлләр министрлыгының менә шушы өлкәдәге эшчәнлеге кызыксындырды.

Андрей Орлов әйтүенчә, халыкка теге яки бу хәбәрне җиткерү системасы 70-80 нче елларда урнаштырылган. Алар бүген дә эшли. Дөрес, нинди дә булса куркыныч янаган урыннарга (су басу, янгыннар куркынычы булган территорияләргә) сиреналарны өстәмә рәвештә соңгы елларда гына урнаштырганнар. Сиренадан кала, кеше күп җыелган урыннарда (сәүдә үзәкләрендә, спорт объектларында) - махсус экраннар, транспортта - "йөгерек юллар", йортта яшәүчеләргә домофоннар аша хәбәр ирештерелә. Болардан кала, теге яки бу гадәттән тыш хәлләрне халыкка смс-хәбәр аша да җиткерәләр. Мондый чаралар ярдәмендә яңалык халыкның 70-80 процентына барып ирешә, ди белгечләр.

Бүген без хәбәр итү системасын планлы рәвештә тикшердек. Әгәр тегенди-мондый хәл килеп чыккан очракта, сирена тавышын ишетү белән үк телевизорны кабызып, "Татарстан-Яңа Гасыр" телеканалыннан җиткерелә торган хәбәрне тыңларга кирәк. Бер кая да йөгерергә, куркып калырга кирәкми. Аннан соң һәр кеше үзе яши торган йортның подвалына төшәргә тиеш, - диде Андрей Орлов.

Халыкның тормышына куркыныч янаган очраклар килеп чыкканда, саклану корылмаларына, ышыклану урыннарына һәм подвал биналарына яшеренергә кирәк. Аларны инвентаризацияләү вакытында Татарстанда шундый 500 бина эшкә яраксыз дип табылып, учеттан алынган. Ә менә бүгенге көндә 1100 объект элекечә үк Россия Гадәттән тыш хәлләр министрлыгының ресстр учетында тора.
Без тикшерү эшләре дә алып барабыз. Әгәр бу корылманың торышы өчен җавап бирә торган оешма үз вазыйфасын тиешле дәрәҗәдә башкармаса, штрафка тартыла, - дип аңлатты җитәкче.