Табибларга торак алуга сертификат бирмәкчеләр. Әмма бөтенесенә дә түгел

Шуның ярдәмендә аларны төбәкләргә җәлеп итмәкчеләр. Әмма моның өчен табиблар дәүләт медицина учреждениеләрендә кимендә биш ел эшләргә тиеш булачак. Торак сертификатларын кертү тәкъдиме белән Дәүләт Думасы вице-спикеры Владислав Даванков чыгыш ясады, дип хәбәр итә ТАСС.

Сертификатны арзанрак бәядән торак сатып алу яки арендалау, йә торакка беренчел кертем өчен кулланырга мөмкин булачак, дип аңлата ул. Даванков билгеләп үткәнчә, бу инициатива табибларның регионнарга килүенә ярдәм итәчәк, шулай ук белгечләр кытлыгы проблемасын хәл итәчәк. Программаны ташламалы ипотека буенча гамәлдәге программаларны яңадан карау исәбенә финансларга мөмкин, ди ул. Исегезгә төшерәбез: ташламалы ипотека 2024 елда бетәчәк.