#Кыскача яңалыклар 23 август 2022, 11:18

Тагын бер хәрби һәлак булган: "Соңгы минутка кадәр минем улым түгелдер, дип көттем"

23 август 2022, 11:18

Украинадагы махсус хәрби операциядә батырларча һәлак булган Арча егете Алмаз Әгълиев Яңа Кырлай зиратына җирләнгән.

Скопировать ссылку

21 август көнне майор Алмаз Әгълиев белән хушлашу чарасы әтисенең төп нигезендә узган. Хәмит Әгълиевның улы Алмаз 1990 елның февралендә дөньяга килә. Новосибирск шәһәрендәге Югары Хәрби училищены тәмамлаганнан соң, 10 ел хәрби хезмәттә була.

2022 елның 20 февралендә Украинага китә.
Батыр егетне соңгы юлга озатырга якын туганнарынан тыш, Казан шәһәре һәм Арча районнары хәрби комиссариат вәкилләре, Арча районы башлыгы Илшат Нуриев, район мөхтәсибе Әмир хәзрәт Миңнемуллин, хәрби хезмәттәшләре, дуслары кайткан. Ил өчен, районыбыз өчен әлеге үзәк өзгеч ачы хәсрәт беркемне дә битараф калдырмады.

Алмазның әти-әнисе, бертуган энесе, тормыш иптәше һәм ике баласы бүген иң кадерле кешеләре белән хушлашты. "Соңгы минутка кадәр минем улым түгелдер, хаталанганнардыр дип көттем"- дип өзгәләнде әнисе Нурия ханым.
Гаиләсенең, якыннарының кайгыларын уртаклашып, күркәм сабырлык телибез.