Татарстан Президенты коммуналь түләүләр белән “шаярмаска” кушты

Татарстан Президенты Рөстәм Миңнеханов кышкы җылыту сезонында җылылык белән тәэмин итү чыганакларыннан файдаланылган күләмнәрне хисапка алуга һәм халыкка җиткерелгән исәп-хисап кагәзъләрендәге төгәллеккә нык игътибарлы булырга чакырды. 2022 елның 1 декабреннән бөтен ил буенча торак-коммуналь хезмәтләргә тарифларның уртача 9 процентка арттырылганлыгын искәртте ул.

— Республика халкы декабрь өчен квитанцияләрне яңа тарифлар нигезендә ала башлады инде.Татарстанның Төзелеш министрлыгы, районнар хакимиятләре башлыклары һәм шушы юнәлештәге оешмалар җитәкчеләре тарафыннан исәп-хисапларның төгәллеген саклау зарур. Кергән шикаятьләрнең һәм мөрәҗәгатьләрнең һәммәсе буенча да тикшерүләр оештырылсын. Халыкка түләүләрнең артуы сәбәпләрен аңлату, шулай ук республикада гамәлдә булган социаль ярдәм чаралары турында сөйләү мөһим,-диде Рөстәм Миңнеханов.
 Татарстан Президенты социаль яклауга мохтаҗ категориядәге гражданнарга ярдәм чаралары, торак-коммуналь хезмәтләр өчен түләүләрдә ташламалар каралганлыгын әйтте. Рөстәм Миңнеханов республиканың Хезмәт, эш белән тәэмин итү һәм социаль яклау министрлыгына халыкка субсидияләр бирүне үзвакытында башкарырга кушты.