Татарстанда -24 градуска кадәр салкын көтелә

Татарстан аязучан болытлы һава торышы, урыны белән кар фаразлана. Җил төньяк-көнбатыштан исәчәк.

22 гыйнвар көнне төнлә һәм иртән һава температурасы -16..-21 градус фаразлана, аязганда -24 градуска кадәр суытырга мөмкин. 

Казанда бүген төнлә һәм иртәгә иртән һава температурасы -17..-19 градус, аязганда -22 градуска кадәр. Иртәгә көндез республика башкаласында явым-төшем ихтималы аз. Һава температурасы -12...-14 градус арасында тибрәләчәк. Юлларда бозлавык булырга мөмкин.

Элегрәк Россия Гидрометүзәге җитәкчесе Роман Вильфанд хәбәр иткәнчә, Идел буе (көнчыгышта), Урал һәм Себер төбәкләрендә сишәмбедән пәнҗешәмбегә кадәр 20-25 градуска кадәр кискен суыту көтелә. Шул ук вакытта Татарстан Гидрометүзәге татарстанлыларны пәнҗешәмбедән 28 градуска кадәр суыту турында кисәткән иде.