Татарстанда 26 градуска кадәр җылы көтелә

Дөрес, яңгырлар да көтелә. Татарстан Гидрометеорология үзәге хәбәр итүенчә, 16-17 сентябрь көннәрендә республикада температура төнлә 7-12, көндез 14-19 градуска кадәр күтәреләчәк.

Якшәмбе, 18 сентябрьдә, төнлә 9-14 градус, көндез 17-22 градуска кадәр җылы булачак. Урыны белән яңгырлар явуы ихтимал.

Дүшәмбе исә Татарстан халкына җәй кире кайтачак. Һава температурасы көндезге сәгатьләрдә 21-26 градус, төнлә 11-16 градус булыр дип көтелә. Кыска вакытлы яңгырлар, яшен булырга мөмкин.

20 сентябрьдә республика аша салкын атмосфера фронты узачак. Нәтиҗәдә һава температурасы 18-23 градуска кадәр төшәчәк. Кыска вакытлы яңгырлар явачак, дип фаразлый синоптиклар.