Татарстанда авиаһәлакәткә юлыккан самолетта исән калган бердәнбер пассажир турында билгеле булды

"Пациентның хәле авыр булып кала бирә. Аның гомерен саклап калу өчен барлык кирәкле чаралар үткәрелә. Табибларның мультидисциплинар бригадасы эшли", - дип билгеләп үткәннәр Татарстан Сәламәтлек саклау министрлыгында.

Пациент хәзер реанимациядә тәүлек әйләнәсе табиблар күзәтүе астында тора.

Башта пациент Кама Тамагы үзәк район хастаханәсенә алып килгәннәр, биредә аның хәле тотрыкланган, аннан соң аны санавиация вертолеты белән РКБга күчергәннәр. 

Исегезгә төшерәбез, шәхси компания Түбән Новгородтан килгән гаилә өчен һава экскурсиясе үткәргән. Бер версия буенча, янәсе, пилот куркыныч трюк башкарган яки идарә итүне очу хокукы булмаган пассажирларның берсенә тапшырган. Һәлакәт аркасында, гаилә башлыгы гына исән калды. Аның тормыш иптәше, аларның 11 яшьлек кызлары һәм пилот һәлак булган.