Татарстанда МХОда катнашучыларның балаларына 20 мең сум түләргә планлаштыралар

Аның күләме 20 мең сум тәшкил итәчәк, бу ТР Хезмәт министрлыгы тарафыннан эшләнгән ТР Министрлар кабинеты карары проектында язылган. Документ буенча, түләү гаиләдәге 18 яшькә кадәрге һәр балага биреләчәк. Биредә гаиләләрнең керемнәре исәпкә алынмаячак, аларга башка ярдәм чаралары күрсәтеләчәк.

Түләү алучылар исемлеген ТР Хәрби комиссариаты, Росгвардия, ТР буенча Эчке эшләр министрлыгы төзиячәк. Аны мобилизацияләнгән, РФ Милли гвардиясендә хезмәт итүче һәм СВОда катнашкан контрактчылар, махсус хәрби операция уздыру зонасына командировкага җибәрелгән ТР буенча Эчке эшләр министрлыгы, РФ Федераль Куркынычсызлык Хезмәтенең ТР буенча идарәсе хезмәткәрләренең балалары ала алачак.

Шул ук вакытта исемлеккә башка субъект территориясендә чакырылган яки контракт төзегән, әмма Татарстанда яшәү урыны булган гражданнар да керәчәк. 

Түләү алу өчен, баланың әти-әнисе яки законлы вәкиле Татарстандагы матди ярдәм (компенсация түләүләре) үзәгенә гариза бирергә тиеш.

Документ 2023 елның 29 сентябренә кадәр коррупциягә каршы экспертиза узачак.