"Татарстанда яшәүче картасы" дәүләт хезмәтләреннән файдалануны җиңеләйтәчәк

Гадәти чиплы картаны хәтерләтүче «Татарстан Республикасында яшәүче картасы» үзендә түләү, социаль, транспорт кушымталарын берләштерәчәк. Шулай ук карта иясе турында график мәгълүмат та урын алачак: фотография һәм кешенең исеме, фамилиясе, әтисенең исеме, транспорт кушымтасы номеры, СНИЛС номеры күрсәтеләчәк. Моннан тыш карта хуҗасының электрон имзасын да булачак.

Моннан соң, төрле медицина, социаль һәм транспорт сервисларыннан файдалану уңайлырак булачак. Әйтик, табибка язылу, бала туклануы өчен бушлай рецепт формалаштыру, даруларга электрон рецептлар алу, балалар бакчасы өчен түләү компенсациясе кайтарылуы турында хәбәрдар булып тору, ТКХ түләүләре өчен ташлама-субсидияләр түләнүен күзәтеп бару, пенсионерларга юлда йөрү өчен түләүләр алуга, ай саен балага тиешле пособияләр һ.б. субсидияләргә гаризалар бирү бу карта ярдәмендә бик җиңел булачак.

Картадагы транспорт кушымтасы исә шәһәр транспортында бару, Россия тимер юлында ташламалы йөрү өчен түләү мөмкинлеге бирәчәк. Банк түләүләре кушымтасы банк хезмәтләреннән файдалануны уңайлырак итәчәк. Татарстанда яшәүче картасына ия барлык гражданнар өчен лояльлек программасы да каралган -Яшел Үзән территориясендәге проект партнерлары товар һәм хезмәтләр өчен түләгәндә ташламалар бирәчәк.

Проект операторы булып Татарстанның Мәгълүмати технологияләре үзәге тора. Картаны проектта катнашучы банкларда алып булачак. Бу - "Ак Барс банк" һәм "Россия Саклык банкы", карталар чыгарудан тыш алар түләү кушымтасын урнаштыру һәм карап тоту белән шөгыльләнәчәк. Шулай ук карта Татарстан Хезмәт, халыкны эш белән тәэмин итү һәм социаль яклау министрлыгына караган оешмаларда да биреләчәк. Яшел Үзәндә карта алуга гариза бирү һәм карталарны алу пунктлары түбәндәге адреслар буенча урнашкан: Ленин урамы 32,49,70 йортлар, Татарстан урамы 1 йорт, Комаров урамы 23 йорт, Гоголь урамы 50 йорт, Первомайская урамы 5 йорт.

Карталар бушлай барлык теләк белдергән кешегә биреләчәк. Барлык өстәмә мәгълүматны card.tatarstan.ru сайтында табарга була. Шулай ук кайнар линия дә эшләп торачак: 8 (800) 234-15-00.