Татарстанның бер авылында бәйрәм оештыруга 5 млн. сум акча бирелгән

ТР Мәдәният министры урынбасары Дамир Натфуллин сүзләренчә, әлеге чараны оештыруга 5 млн.сум акча бүлеп бирелгән. “Бәйрәмнең абруе елдан-ел арта, быел да бәйрәмгә 15 меңләп кеше килер дип көтелә”, - ди ул.

“Уяв” бәйрәменең күрке – ул “Уяв пики” (“Уяв сылуы”) бәйгесе. Быел бу исемгә 12 сылу көрәшәчәк. Аларның өчесе – Чувашиядән, калганнары Татарстан районнарыннан. Сүз уңаеннан, узган “Уяв пики” исеменә Чувашиядән килгән кыз ия булган.

“Быел бәйгегә яңалык кертергә булдык. Әгәр узган елларда бәйгедә катнашучы кызлар милли ашлар әзерләсә, быел алар әбиләреннән калган милли киемнәрне тәкъдим итәчәк. Без моны яшьләр тарих белән кызыксынсын, сандыктагы элеккеге киемнәрне чыгарсын өчен эшлибез”, - ди Татарстанның чуваш хатын-кызлары берлеге рәисе Сильвия Чаркина.