#Кыскача яңалыклар 05 июнь 2015, 09:20

Тавык шашлыгы ашамагыз

05 июнь 2015, 09:20

Казанда апрель аенда кафе һәм урамдагы төрле сәүдә нокталарыннан алынган шашлык ашап 16 агулану очрагы теркәлгән.Роспотребнадзор идарәсе белгечләре әйтүенчә, күпчелек агулану очраклары сыйфатсыз тавык ите аркасында килеп чыккан. Зыян күрүчеләрнең барысы да хастаханәгә озатылган.

Скопировать ссылку

Тикшерү нәтиҗәләре буенча, кешеләр сальмонелезлы тавык ашап агуланган. Шулай ук теркәлгән очракларның икесендә шашлык тиешенчә кыздырылып җитмәгән булган. Агулану очракларының артуына юл куймас өчен Роспотребнадзор кафе һәм урамда сәүдә итүчеләргә халык күмәкләшеп ял иткән вакытта тавык итеннән шашлык пешерүдән баш тартып торырга киңәш итә. Әгәр өйдә үзегез шашлык кыздырырга уйласагыз, гигиена таләпләрен үтәргә онытмагыз, дип искәртә Роспотребнадзор идарәсе. Итне әзерләгәндә кулны яхшылап юарга, итне ахырына кадәр, тиешенчә кыздырырга кирәк, табигатьтә булганда, ризык өчен бер тапкыр кулланыла торган тарелкалар куркынычсыз, әзер шашлыкны кызгач ук ашамасагыз, ул +2, +6 градуста суыткычта сакланырга тиеш.

Кызыклы яңалыкларны күзәтеп бару өчен безнең МАХ каналына кушылыгыз.