1 сентябрьдән балалы аналарны эшкә алу кагыйдәләре үзгәрә: нәрсәне белергә кирәк?

1 сентябрьдән эш бирүчеләр 3 яшькә кадәрге баласы булган хатын-кызларны эшкә алганда сынау срогы билгели алмаячак. Бу хакта РФ Иҗтимагый палатасының иҗтимагый контроль һәм гражданнар мөрәҗәгатьләре белән эшләү комиссиясе әгъзасы Евгений Машаров РИА Новостига сөйләгән.

Яңа норма әниләргә генә кагылмый. Ул 3 яшькә кадәрге баланы әнисез тәрбияләүче затларга да тарала.

Хәзерге вакытта сынау срогына кагылышлы тыю 1,5 яшькә кадәрге балалары булган хатын-кызларга гына кагыла. 1 сентябрьдән баланың яше буенча чик өч елга кадәр арттырыла.

Эш бирүчеләргә нәрсәне истә тотарга кирәк?

Евгений Машаров сүзләренчә, оешмаларга хезмәт документларын алдан ук яңадан карап чыгарга туры киләчәк. Аерым алганда, хезмәт килешүләрендәге сынау срогы турындагы шартларны һәм шул хактагы локаль норматив актларны үзгәртергә кирәк булачак.

Шулай ук эшкә урнашканда хезмәткәрнең 3 яшькә кадәрге баласы булуын раслаучы мәгълүматларны исәпкә алу мөһим.  

Яңа таләпләрне бозу эш бирүче өчен юридик нәтиҗәләргә китерергә мөмкин. Әйтик, хезмәт килешүенә сынау срогы турында шарт кертелсә, ул үз көчен югалтачак.

Моннан тыш, хезмәткәрне сынау срогын үтәмәү сәбәпле эштән чыгару законсыз дип бәяләнергә мөмкин.

Яңа кагыйдәнең төп максаты — кечкенә баласы булган ата-аналарның хезмәт хокукларын өстәмә яклау һәм аларның эшкә урнашу мөмкинлекләрен киңәйтү.